marea de vigo alerta do aumento de desafiuzamentos en vigo froito do traspaso de activos inmobiliarios da banca aos fondos voitre.

4 de Novembro de 2018

Marea de Vigo alerta do aumento de desafiuzamentos en vigo froito do traspaso de activos inmobiliarios da banca aos fondos voitre.

Marea de Vigo súmase á denuncia da PAH Tui-Vigo, na que alerta que o vindeiro mércores unha nai con tres fillas menores poden ser expulsadas da súa vivenda e pide ao Concello e á Xunta que actúen de urxencia poñendo unha solución “inmediata e definitiva” para esta familia viguesa.

Vigo, 4-11-2018. Para a Marea de Vigo, o caso desta familia con tres menores e ingresos que apenas chegan aos 500 euros ao mes é un claro exemplo da práctica actual da banca, vendendo o seu activo inmobiliario a fondos voitre, neste caso ao fondo Cerberus, mesmo en moitas ocasións con familias inquilinas dentro, tal e como acontecerá este mércores de chegarse a executar o desafiuzamento.

Segundo informa a PAH, esta familia pagaba o alugueiro ao antigo propietario da vivenda, cambiando posteriormente a titularidade cara ao BBVA e agora a este fondo, Cerberus. A Plataforma tamén manifesta que as dúas administracións con capacidade de buscar solución; Xunta de Galicia e Concello de Vigo, nin tan sequera reciben de urxencia á familia e simplemente artellan as citas habituais nos servizos sociais sen tomar medidas de urxencia ao tratarse dunha familia con menores.

Marea de Vigo considera que na nosa cidade e nos concellos limítrofes constátase o fracaso de programas que acabaron sendo meramente publicitarios como o Programa de Vivenda da Xunta ou as políticas auto-proclamadas de loita contra os desafiuzamentos do Concello de Vigo, “meros parches oportunistas sen recursos económicos suficientes e programas útiles para parar esta lacra que están a vivir centos de familias especialmente dende o inicio da crise económica.”

Marea de Vigo considera que o feito de que este fondo de inversión norteamericano, ligado a altos cargos da antiga administración neoliberal de Bush e que está poñendo a súa gadoupa especialmente sobre os activos da gran banca do estado español (BBVA, Sabadell…) con moitas propiedades na cidade de Vigo, augura un problema serio de expulsión masiva de inquilinos á que as administracións públicas da cidade “teñen que anticiparse”. Cerberus está adquirindo o negocio inmobiliario das antigas caixas de aforro así como activos de entidades como Sareb, Bankia e Liberbank.