marea de vigo ante a anulación das sinaturas que sostiñan a pnl polo desenvolvemento do proxecto de porto cabral.

8 de Maio de 2018

Marea de Vigo celebra a anulación, por parte da Xunta Electoral, da totalidade das sinaturas que acompañaban á PNL a favor do macro-centro comercial de Porto Cabral a causa das irregularidades detectadas.

Rubén Perez: “É necesario pedir responsabilidades políticas ao Goberno Local por apoiar este proxecto e á directiva da Comunidade de Montes de Cabral por promovelo, indo ademais en contra da decisión da propia Asemblea de comuneiros.”

Vigo, 8 de maio 2018. A Xunta Electoral de Galicia vén de trasladar tanto á Mesa do Parlamento como aos promotores da PNL que pedía levar a cabo as actuacións necesarias para desenvolvemento do proxecto de Porto Cabral, a declaración de incumprimento do requisito das sinaturas necesarias para a tramitación da mesma, xa que, e segundo a Xunta electoral, non contiña fedatario que autenticase as sinaturas, o que supón unha vulneración da lexislación vixente na materia. Esta nova, para a Marea de Vigo, “supón poñer en dúbida todas as prácticas arredor da promoción deste macro-centro comercial e de ocio (para nós ‘macro-pelotazo’), é dicir, as irregularidades acontecidas na recollida das sinaturas, todos os apoios de determinados colectivos que asinan a PNL e, por enriba de todo, a vulneración do acordo dos comuneiros de Cabral que dixeron ‘non’ a ese proxecto.” explicaba Rubén Pérez na rolda de prensa que tivo lugar no día de hoxe.

Para a Marea de Vigo, a postura segue sendo a mesma, do mesmo xeito que o é sobre a legalidade do propio proxecto e o seu encaixe no futuro PXOM, no que, segundo o grupo municipal, a ficha de Liñeiriños non pode volver a aparecer. Nesta liña, no mes de decembro presentábase no Pleno unha moción, onde se pedía o rexeitamento explícito a este proxecto, mais a moción foi rexeitada. “É tamén necesario pedir responsabilidades políticas ao goberno local por apoiar este proxecto, así como á directiva da comunidade de montes de Cabral por promovelo. Que fai un presidente dunha comunidade de montes actuando como promotor dunha iniciativa que di todo o contrario do que aproba a asemblea da súa comunidade?” cuestiona Rubén Pérez.

Pola súa banda, Xosé Lois Jácome, concelleiro do grupo municipal da Marea de Vigo, incidía na oposición ao formato de grandes superficies comerciais, “estes proxectos venden unha creación de postos de traballo que non existen, coma se estivesen illados e desvinculados uns dos outros, e coma se o comercio local puidese soportar un crecemento ‘infinito’. O noso modelo é o comercio de proximidade, onde os beneficios quedan na cidade e o emprego xerado é digno e de calidade. Non é o mesmo que os beneficios queden na cidade de Vigo a que vaian a fondos de inversión, como son por exemplo Intu ou Eurofund, promotores de Porto Cabral”

Alén disto, Jácome incidiu na incoherencia da postura do goberno vigués. “Non entendemos como o goberno desta cidade mantén unha posición tan férrea a un centro comercial proxectado en Mos, oposición baseada entre outras cuestións no impacto sobre o comercio local de Vigo, e sen embargo non é capaz de posicionarse con claridade con respecto ao proxecto de Porto Cabral, cuxo impacto no comercio local podería chegar a ser moito maior dadas as características do proxecto. Dende logo a nós non nos vale ningún proxecto desa índole, e precisamente non nos vale por ese impacto no comercio de proximidade”.