marea de vigo leva a pleno a petición de comisión de investigación do mar de vigo

3 de Novembro de 2016

O GRUPO MUNICIPAL DA MAREA DE VIGO LEVARÁ O VINDEIRO PLENO A PETICIÓN DE COMISIÓN DE INVESTIGACIÓN SOBRE O AUDITORIO MAR DE VIGO.

O pasado 7 de outubro o Grupo Municipal rexistrou a petición da comisión, que será levada o pleno, en forma de moción, o próximo luns.

O auditorio Mar de Vigo está a converterse ano tras ano nun verdadeiro problema para esta cidade e para os recursos públicos, e a recente entrada en concurso de acredores da UTE que o xestiona ven a amosar as consecuencias da mala xestión deste espazo que xa, durante a súa construción, xerou unha serie de problemas que desembocaron daquela noutra comisión de investigación, entre outras problemáticas, porque, dun proxecto inicial de 85,7 millóns de euros, acabou en 154,5; case duplicando os custes.

Rubén Pérez, voceiro do Grupo Municipal da Marea de Vigo, lembra que tamén “en 2012 ampliouse a concesión a 25 anos e desembolsáronse 5 millóns de euros, argumentando a ampliación de prazas de rotación no actual aparcadoiro cando non existiu nunca demanda das mesmas.”

Para a Marea de Vigo, non e concibible que, a unha concesionaria que recibe ao ano medio millón de euros para a xestión da actividade cultural, a que ademais se lle subvencionan gran parte das actividades que se realizan no espazo e ademais agora se lle pretenden dar mais de 800.000 euros para alugar un espazo para a UNED, non se exerza sobre ela control algún, e, ao final, tal e como xa comeza a ser costume neste concello, acabe nunha situación de concurso de acredores, o que fai a situación actual insostible.

Polo tanto, Marea de Vigo, vai pedir no pleno do luns, a apertura dunha Comisión Especial de Investigación sobre o Auditorio Mar de Vigo e todos os contratos, convenios, actividades ou calquera tipo de intervención existente no presente e pasado entre este concello e a empresa concesionaria, así como entre as persoas que forman parte de ambas entidades.