marea de vigo pide sancións á empresa vitrasa polos incumprimentos e inacción en materia de medidas de seguridade sanitaria ante a crise da covid-19.
Por Marea de Vigo
Marea de Vigo pide sancións á empresa VITRASA polos incumprimentos e inacción en materia de medidas de seguridade sanitaria ante a crise da COVID-19.
Rubén Pérez: “Imos pedir medidas e multas exemplares á empresa VITRASA por non actuar con responsabilidade. Tiña que ter feito a súa labor e ter cumprido o seu papel como empresa concesionaria dun servizo público, actuando de xeito coherente en canto aos aforos, as frecuencias e os horarios máis axeitados para a situación que estamos vivindo”
Vigo, 16-11-2020. Toda vez que se coñece que a Xunta insta ao Concello de Vigo á realización dunha inspección para controlar os aforos do transporte público dos autobuses da empresa VITRASA, “comprobamos que este é un capítulo máis do esperpento que tanto a administración autonómica coma o Concello de Vigo están facendo para un control efectivo da seguridade e os aforos no transporte público urbano da cidade” afirma Rubén Pérez, voceiro do Grupo municipal da Marea de Vigo.
“Independentemente de que poidamos entender que o Concello a través da policía local teña que facer esas inspeccións e ese control de aforo – explica o concelleiro – , a norma autonómica resulta absolutamente inxustificable na situación de crise sanitaria que estamos vivindo, xa que permite que se sigan usando o 100% das prazas sentadas nos buses, limitando o aforo únicamente ás persoas que van de pé”.
Marea de Vigo constata que “se están facendo inspeccións por parte da policía local”, e pide que “a norma autonómica limite tamén as prazas sentadas, cumprindo así a mesma norma en materia de distancia” engade Rubén Pérez.
Para o Grupo municipal, “VITRASA non quixo actuar de xeito responsable, permitindo un total descontrol en varias frecuencias e horarios” polo que “semella que a VITRASA impórtalle ben pouco a saúde e a seguridade da veciñanza viguesa” conclúe Rubén Pérez.